Қазақстан Республикасының екі азаматы әлеуметтік желілерде ұлтаралық араздықты қоздырғаны үшін 5 жылға сотталды. Сот Марғұлан Боранбаевтың өзін ұлт патриоты ретінде таныстырып, мемлекеттік жүйені өзгертуге шақырғанын анықтаған.

Алматының Алмалы аудандық сотының шешімімен екі Facebook қолданушысы Марғұлан Боранбаев пен Данат Намазбаев ұлтаралық және әлеуметтік араздықты қоздыратын жарияланымдары мен пікірлері үшін 5 жылға бас бостандығынан айырылды.

Тергеу барысында белгілі болғандай, сотталғандар 2018 жылдан бері әлеуметтік желідегі парақшаларында ұлттық және әлеуметтік араздықты қоздыруға бағытталған, орыс ұлтының өкілдерінің ұлттық ар-намысы мен қадір-қасиетін қорлайтын жазбалар жариялап келген.

— Сонымен қатар олар ұлты мен нәсіліне байланысты ресейліктердің төмен дәрежеде екендігін көрсетіп, оларға қарсы физикалық күш қолдануға шақырған, — делінген сот хабарламасында.