Қазақстанның экс-президенті Нұрсұлтан Назарбаев «құрметті сенатор» атағынан айырылды. Бұл туралы Сенат төрағасы Мәулен Әшімбаев мәлімдеді.

Азаттық тілшісінің сұрағына жауап берген Сенат төрағасы Ертең тұңғыш президент туралы заңның күші жойылатынын айтты.

– Осыдан екі-үш апта бұрын сенаттың регламентіне тиісті өзгерістер енігзілді. Сол кезде құрметті сенатор атағын регламенттен алып тастадық. Қазір бізде ондай институт жоқ. Шешім қабылдаған себебіміз – былтыр маусымда өткен референдумда Конституциядан тұңғыш президент елбасына қатысты нормалар алынып тасталды. Бұл халықтың шешімі. Ертең тұңғыш президент туралы заңның күші жойылайын деп жатыр. Конституциялық соттың тиісті шешімі бар. Соны ескеріп, біз де регламенттен алып тастағанбыз. Сол себепті бұл жерде ешқандай сұрақ болуы мүмкін емес, – деді Әшімбаев.

Оның айтуынша, бұл – халықтың шешімі. Ол сондай-ақ құрметті сенатор атағы тек бір адамға берілгенін түсіндірді. Бұл атақ Парламенттің жоғарғы палатасының регламентінен толығымен алынып тасталды.