Астанада мүгедек балаларға қатыгездікпен қарау фактісі бойынша қылмыстық іс қозғалды, деп хабарлайды Exclusive.kz.

Елорда тұрғыны 17 қаңтар күні полицияға «Балам-Ай» баланы дамыту орталығында оның кәмелетке толмаған ұлына қатыгездікпен қарау фактісі бойынша жүгінген.

Полиция басқармасының мәліметінше, бұл іске қатысты қылмыстық іс қозғалған.

– «Алматы» аудандық полиция басқармасының қызметкерлері ҚР ҚК 140-бабы бойынша қылмыстық іс қозғады. Іс бойынша тиісті сараптамалар тағайындалды, олардың нәтижелері бойынша кінәлі адамдарға қатысты қолданыстағы заңнамаға сәйкес шешім қабылданатын болады, – деп жазылған хабарламада.