Түркияның Хатай провинциясындағы зілзала салдарынан қираған ғимарат үйіндісінің астынан Мирболат Құрмашевтің денесі табылды, деп хабарлайды Exclusive.kz ТЖМ баспасөз қызметіне сілтеме жасап.

– Үйінді астынан іздестіру барысында құтқарушылар алдын ала белгіленген іздестіру орнына қол жеткізу үшін барынша жедел түрде арнайы ойық жасады. Құтқарушылар кішкентай бос орындар арқылы ойықтың ішіне кірді. Бұл ретте құтқарушылар құрылымдық элементтердің қайта құлауын болдырмау үшін тосқауылдарда аз саңылаулар жасауға тырысты, – деп жазылған хабарламада.

Марқұм Мирболат Құрмашев – Astana Hub технопаркінің халықаралық агенті. Туыстары Мирболатты тірідей табамыз деп үміттенген еді.

Құрмашев жер сілкінісі кезінде әріптестері Әділ Қадырбеков, Сәбина Мамадьярова және Құбилай Кескинмен бірге Хатай провинциясында болған. Әділ Қадырбековтің де үйінді астынан денесі табылды.

Коллаж: Exclusive.kz