Алматыдағы тұрғын үйлердің үштен бірі 9 балдық жер сілкінісі кезінде қирауы мүмкін.

Мұндай болжамды Төтенше жағдайлар бірінші вице-министрі Ибрагим Күлшімбаев Орталық коммуникациялар қызметінде өткен брифингте айтты, деп хабарлайды Exclusive.kz.

Ықтимал зілзала кезіндегі ең қауіпті аудандар – Медеу және Бостандық. Түрксіб ауданы ең қауіпсіз болып саналады.

Оның айтуынша, Алматы қаласы тектоникалық плиталардың қауіпті жерінде орналасқан. Айта кетейік, бүгін Алматыға жақын маңда жер сілкінісі тіркелді.

– Алматының еліміздегі сейсмикалық қауіпті өңірлерінің бірі екендігімен келісемін. Қала 27 тектоникалық плиталардың қауіпті жерлерінде орналасқан. Мегаполисте қатты зілзала болған жағдайда шаһардың 60-70 пайызы қирайды дегенге келіспеймін. Болжамды мәліметтерге сүйенсек, 9 және одан да жоғары балдық жер сілкінісі болған кезде тұрғын үйлердің 30 пайызына дейін қирауы мүмкін, – деді Күлшімбаев.